அமுதசுரபி

கடந்தவாரத்தில் ஒரு நாள் காலை, வட அமெரிக்கத் தமிழ்ச் சங்கத்தின் ஒருங்கிணைப்பாளர்களில் ஒருவரான திரு பாலகன் அய்யா அவர்களிடமிருந்து ஒரு அலைபேசி அழைப்பு. திருப்பூர் வருவதாகவும்  சந்திக்க வருமாறும் அழைத்தார்.  நானும், நமது ஈரோடு வலைப்பதிவர்கள் குழுமத் தலைவர் திரு.தாமோதர் சந்துரு, குழுமத்தின் புரவலர், திரு.டிவிஎஸ். விஸ்வம் ஆகியோரும் திருப்பூர் சென்றோம்.  வைர வணிகர், திரு சிபி.பரசுராமன் அவர்களும் எங்களோடு இணைய, கே.ஆர்.ஜி. தங்கும் விடுதியில் வட அமெரிக்கத் தமிழ்ச் சங்கத்தின் ஒருங்கிணைப்பாளரை சந்தித்துப் பேசிக். கொண்டிருந்தோம். 

அங்கே வந்த, திருப்பூர் தமிழ்ச் சங்கத்தின் தலைவர் திரு. கே.பி.கே. செல்வராஜ் எங்களையும், அன்று நடக்கவிருந்த மு.வ. நூற்றாண்டு விழா நிகழ்ச்சிக்கு அழைத்துச் சென்றார். விழா துவங்கும்முன்,  சிறப்பு அழைப்பாளராக வந்திருந்த “அமுதசுரபி” ஆசிரியர் திரு. திருப்பூர் கிருட்டிணன் அவர்களோடு பேசிக் கொண்டிருந்தோம்.  மடைதிறந்த வெள்ளமென அவர் பேசிக் கொண்டிருக்க உடனிருந்த அனைவரும் மெய்மறந்து அவர் பேச்சைக் கேட்டுக் கொண்டிருந்தோம்.

மு.வ வில் தொடங்கி, சின்ன குத்தூசி வரை பலரும் அவர் பேச்சினுடே வந்து சென்றார்கள். கடைசியில் அமுத சுரபி பத்திரிக்கையின் சனவரி 2012 மாத இதழ் ஒன்றை என்னிடம் கொடுத்து விட்டு, விழா அரங்கிற்குள் சென்று விட்டார். நானும் அவர் கொடுத்த இதழை வாங்கி என் மடிக் கணிணி பையிலே வைத்தேன். பின் மறந்து போனேன்.

இன்று காலை பையை எடுத்த போது அதிலிருந்த அமுத சுரபி வெளியே வந்து விழுந்தது. அடடா..மறந்து போனோமே என்று நினைத்து, அதைக் கையோடு படிக்கத் துவங்கினேன்.

உண்மையிலேயே பெயருக்கேற்ற இதழ் தான்.  அள்ள அள்ளக் குறையாத அட்சய பாத்திரமாக, அமுதசுரபியாகத்தான் இருந்தது. இன்னொன்றையும் சொல்ல வேண்டும். கடந்த 64 ஆண்டுகளாக தொடர்ந்து வெளிவந்து கொண்டிருக்கும் இந்த இதழ்களில்  சிலவற்றை பல ஆண்டுகளுக்கு முன் படித்திருக்கிறேன். பிறகு ஏனோ படிப்பது நின்று போய்விட்டது. 

ஓரிரு வாரங்களுக்கு முன்பு  சேலம். கவிஞர். தமிழ்நாடன் அவர்கள் வீட்டில், பல ஆண்டுகளுக்கு முந்தய அமுதசுரபி இதழ்களை அவர் சேர்த்து வைத்திருந்தது நினைவிற்கு வருகிறது.  தமிழில் வெளிவரும் மாத இதழ்களில் சேர்த்து வைத்து, மீண்டும் மீண்டும் படிக்கத் தோன்றும் வண்ணம் அந்த இதழ் இன்றும் இருப்பது மகிழ்சிக்குரியது. இது போன்ற இதழ்கள் தமிழுக்கும், தமிழருக்கும் அவசியமான ஒன்றாகத் தோன்றுகிறது.

திருப்பூர்.கிருட்டிணன் அவர்களை ஆசிரியராகக் கொண்டு வெளிவந்து கொண்டிருக்கும் இந்த இதழ், உண்மையிலேயே ஒரு தரமான இலக்கிய இதழ் தான்..

அதில் நான் படித்தவற்றை இங்கே உங்களோடு பகிர்ந்து கொள்ள ஆசைப்படுகின்றேன்.

வழுவழுப்பான முன் அட்டைகளைத் தாண்டியதும் “தமிழறிஞர்கள் கவனத்திற்கு” என்று குறிப்பிடப்பட்டிருந்த ஒரு விளம்பரம் கண்ணில் பட்டது. சரி இது அறிஞர்களுக்குத்தானே, நமக்கல்லவே, என்று அடுத்த பக்கம் திருப்பும் முன் சரி…என்னதான் எழுதியிருக்கிறது என்று பார்ப்போமே என்று படித்தேன். 

திரு. ஐய்ராவதம் மகாதேவன், B-1 நறுமுகை அடுக்ககம், பிருந்தாவன் நகர் விரிவு, ஆதம்பாக்கம், சென்னை-88 

என்ற முகவரியிட்ட விளம்பரம் தொல் பொருள் அதிகாரம் பக்:686.ல் குறிப்பிடப் பட்டிருக்கும்”இருடீர் மணிவிளக்கத் தேழிலார் கோவே………” எனத் தொடங்கும் அவ்வையின் பாடல் “ஏழில் கோவை” என்ற நூலில் இருப்பதாக இரா. இராவகவையங்கார் அவர்கள் குறிப்பிடுவதாகவும் அந்தப் புத்தகம் பற்றிய தகவல் இருந்தால் மேலே குறிப்பிடப்பட்ட முகவரியைத் தொடர்பு கொள்ளவும் . 

ஆகா….பரவாயில்லையே….இது போன்ற விளம்பரங்கள் கூட வருகிறதா? என்று ஆச்சரியமாக இருந்தது. யாருகிட்டயாவது இருந்தாக் கொஞ்சம் கொடுத்துதவுங்கய்யா….

ஆசிரியர் உரையில், சென்னை புத்தகத் திருவிழா குறித்த ஒரு விமர்சனம்   எழுதப் பட்டிருந்தது. அதைவிட சுவராசியமானது அதன் கீழே கொடுக்கப் பட்டிருந்த ஒரு துண்டுப் பட்டி…….

    “அமுத சுரபி- இதழ் அல்ல, இயக்கம்………என்ற வரிகள்

மிகவும் ரசித்தேன்…….

”இசையும் நவீன இலக்கியமும்” என்ற தலைப்பில் ஆசிரியர் திரு. திருப்பூர் கிருட்டிணன் அவர்களின் கட்டுரை சிறப்பாக இருந்தது. சங்கீத யோகம் என்ற கே.ரங்க ராசனின் கட்டுரையும் இசை விழா சிறப்புப் பகுதியாக வந்திருக்கிறது. இசைக்கு மொழி அவசியமா? என்ற திரு வ.வே.சு அவர்களின் கட்டுரையும் இதில் ஒன்று  இசை ரசிகர்களுக்கு ஒரு விருந்துதான்.

ஸ்ரீமான்.ஸ்ரீமதி என்ற வார்த்தைகளை முடக்கி, திருவாளர், திருமதி என்ற வார்த்தைகளைப் பயன்படுத்த வேண்டும் என்று சென்னை மாநகராட்சியில் தீர்மானம் நிறைவேற்றியவரும், ”அச்சுக்கலை”, ”அச்சும் பதிப்பும்” போன்ற நூல்களை எழுதியவருமான தமிழறிஞர்.மா.சு.சம்பந்தன் காணாமல் போய்விட்டார். எங்கே சென்றார் என்ற எந்த தகவலும் இல்லை என்ற விவரம், மற்றும் அவர் பற்றிய குறிப்புகளோடு ஆதிரை என்பவர் எழுதிய “தமிழறிஞர் மா.சு. சம்பந்தன் எங்கே? என்ற கட்டுரை என்னை அதிர்ச்சியில் ஆழ்த்தியது. ஒரு முதுபெறும் தமிழறிஞரைப் பற்றி தெரிந்து கொள்ளவும் உதவியது.

ஓவியர் மணியம் செல்வம், அவர் தந்தையார், ஓவியர் திரு. மணியம், ஓவியர் சந்திரா ஆகியோரின் கல்கி அனுபவங்கள் குறித்துப் பேசியவை பதிவாக்கப் பட்டிருந்தது. ஓவியர் மணியம் மற்றும் ஓவியர் சந்திரா ஆகியோரின் பல்வேறு ஓவியங்களும் அச்சிடப்பட்டிருக்கின்றன. பத்திரப் படுத்த வேண்டிய ஒன்று.

அந்தக் கால மருத்துவர்கள்: என்ற தலைப்பில் மருத்துவர். ஆசந்தா லட்சுமிபதி குறித்து திருமதி.சுதா சேசய்யன் எழுதிய கட்டுரை அனைவரும் படிக்க வேண்டிய ஒன்று. இதழ் ஒன்றை வாங்கிப் படித்துப் பாருங்கள்.

 என் சிறுவயதில், மிகவும் பிரபலமானவரும், கோவில்களில் தொடர் சொற்பொழிவாளராகவும் விளங்கிய புலவர். திரு. கீரன் அவர்களின் துணைவியார், திருமதி. செல்லப்பாப்பா கீரன் அவர்கள், நான் சந்தித்த நல்லவர்கள் என்ற பகுதியில், கீ.வா.ஜா வுடனான நட்பு குறித்து எழுதியிருக்கிறார். அருமை….

லா.ச.ரா என்கிற ரசிகரும், லா.ச.ராவின் ரசிகரும் என்ற திரு.லா.ரா.சப்தரிசி அவர்களின் பகிர்வு….. அட……அட….

இலங்கையில் கண்ணகி என்ற திரு.மு.சீனிவாசன் அவர்களின் கட்டுரை மிக அருமை. பல்வேறு புதிய தகவல்கள். ஈழ மண்ணின் இலக்கியவாதிகளைப் பற்றிய அலசலோடு, ஒரு வரலாற்று ஆய்வறிக்கையாகவும் அமைந்திருக்கிறது.  இதைப் படித்த பின் இதைத் தாண்டிச் செல்ல முடியவில்லை.

இதுவரை பாதிப் புத்தகம் தான் படித்திருக்கின்றேன். படித்தவற்றை அசை போடத் துவங்கிவிட்டது என் மனம். தமிழின் ஒரு மிகச் சிறந்த இதழை இத்தனை நாட்கள் வாசிக்காமல் போனதற்காக வருத்தப் படுகின்றேன். இனி தொடர்ந்து படிக்க முடிவு செய்து, ஆயுள் சந்தா அனுப்ப முடிவு செய்துவிட்டேன்.……..

உண்மையில்……அமுதசுரபி-ஒரு இதழ் அல்ல……இயக்கந்தான்…

நம் வீட்டு வரவேற்பறைவரை வந்து, தான் வாரிச்சுருட்டிய குப்பைகளையெல்லாம் கொட்டிவிட்டுச் செல்லும் வணிக ரீதியான தொல்லைக் காட்சிகளோடு வாழ்கிறோம்.  வார, மாத இதழ்கள் மார்தட்டி

படங்களோடு, மட்டமான ரசனைகளை ஊக்குவித்து கல்லா கட்டும் காலச் சூழலில் மொழி-,  கலை, இலக்கியம், கலாச்சாரம் ஆகியவற்றை இழக்காமல் இருக்க இல்லந்தோறும் இருக்க வேண்டிய இதழ் தான்.

சந்தா விவரம்:

உள்நாடு:

ஆண்டு சந்தா: ரூ.300/-..

5 ஆண்டு சந்தா:ரூ.1500/-

ஆயுள் சந்தா: ரூ 5000/-

வெளிநாடு ஆண்டு சந்தா: ரூ2500/-

தொடர்புக்கு:

திரு குமரேசன்

அலைபேசி எண்:98403 62648

தொலைபேசி: 044-26152869,26152556,43538245.

வட்டார வழக்கு.........

நேற்று மாலை மின் தமிழ் குழுமத்தின். திரு கண்ணன் அவர்களோடு அலைபேசியில் பேசினேன். கடந்த வாரம் தமிழ் மரபு அறக்கட்டளையைச் சார்ந்த திரு. நா. கண்ணன் அவர்களும், திருமதி சுபா அவர்களும் ஈரோடு வந்திருந்தனர்.  மின் தமிழ் குழுமத்தின்உறுப்பினர் திருமதி. பவள சங்கரி அவர்களின் பேரன்பினால் இவர்கள் இருவரையும் சந்திக்கும் வாய்ப்பு பெற்றேன். அவர்களோடு சேலம் கவிஞர். தமிழ்நாடன் அவர்களைச் சந்தித்து பேசி வந்தோம். பல அறிய தகவல்களோடும், புத்தகங்களோடும் ஊர் திரும்பினோம்.. 

ஈரோட்டிலிருந்து சேலம் செல்லும் வழியில் பல்வேறு செய்திகளை அனைவரும் பகிர்ந்து கொண்டது மகிழ்ச்சியாக இருந்தது.  செல்லும் வழியெங்கும் கொங்கு வட்டார வழக்கில் நான் பேசுவது குறித்து விமர்சனங்களும், பாராட்டுகளும் கிடைக்கப் பெற்றேன்.

கிராமியச் சுழலில் வளராமல், நாகரீகமென நம்பப் படுகின்ற நகரச் சூழலில் வளர்ந்தவன் நான். வட்டார வழக்கில்  மக்கள் பேசுவதை கேட்கும்பொழுது மகிழ்சி அடைந்ததை வார்த்தைகளில் எழுதிட முடியாது.  ஆனால் நான் கல்லூரியில் முதுகலை பட்டம் முடித்து ஈரோட்டிற்கு வந்த சேர்ந்த பொழுது, ஒன்றை தெளிவாக உணர முடிந்தது.  நாகரீகம்,  படித்தவன் என்ற போர்வைக்குள் தம்மை நுழைத்துக் கொள்:வதற்காக,  மக்கள்  வட்டார வழக்கை விடுத்து, நாகரீகத் தமிழுக்கு மாறிப்போனதை காண முடிந்தது.

 

திருமணவீட்டிலிருந்து, சிறு தெருமுனை கடை வரை, எங்காவது உணவு வேளையில், ”சோறு கொடுங்க” ”சோறு இருக்கிறதா?” என்று நான் கேட்ட போது அவர்கள் என்னை நம்ப முடியாமல் பார்த்தனர். உணவு வேளைகளில் அனைவரும் ”ரைஸ் போடுங்க, ரைஸ்எடுத்துகிட்டு வா” ”மீல்ஸ் எடுத்துகிட்டு வாங்க” அப்படி பேசுவதை கேட்ட போது எனக்குள்ளே ஏதோ வலி வந்தது உண்மை.  சோற்றுக்கும் அரிசிக்கும்முள்ள வேறுபாடு தெரியாதவர்கள் இல்லை இந்த மனிதர்கள். நாகரீகம் என்ற பெயரில் இவர்களின் பேச்சும் நடவடிக்கையும் என்னை வேதனைப் படுத்தியது உண்மை.

வட்டார வழக்கில் பேசுபவன், படிக்காதவன், நாகரீகச் சமுதாயத்தைச் சாராத அறிவிலி என்ற எண்ணம்  மக்களிடையே வேரூன்றத் தொடங்கியது.  என் தோட்டத்தில் வேலை செய்பவரிடமும், எனக்கு கீழே வேலை செய்பவரிடமும்,நான் பழகும் நண்பர்களிடமும், நான் பேசும் மொழியால் கடைபிடிக்கும் நாகரீக நடவடிக்கைகளினாலும், என்னை உயர்ந்தவன் என்று காட்டிக் கொள்ள வேண்டிய விருப்பமும் அவசியமும் எனக்கு இல்லை. எனவே எல்லோரிடமும் என் வட்டார வழக்கில் பேசத் தொடங்கினேன். சக மனிதனாக மதிக்கும், என்  உடன்பணியாற்றுபவர்களோடு சுற்றத்தோடும் நட்போடும் என் வட்டார வழக்கில் பேசுவதன் மூலம் நெருக்கமாய்  இருப்பதாய் உணர்ந்தேன். அதை இன்று வரை தொடர்கின்றேன்.

 என் வட்டார வழக்கில் நான் பேசுவது எனக்கு இயல்பானது அல்ல. ஆனாலும், விடாப் பிடியாக என் வட்டார வழக்கில் இயன்ற அளவு பேச முயற்சிக்கின்றேன். என் பாட்டனும் முப்பாட்டனும், பேசிய இந்த வழக்கு மொழி என் மக்களோடு என்னைநெருக்கமாக்கியிருக்கிறது.  சிறு உணவு விடுதி அல்லது தேநீக் கடையில் சென்று “ ஏனுங் ரெண்டு டீ போடுங்” ” கிழக்க மழையுங்களா?” ”தெக்க போறனுங்க, மறுக்கா நாளைக்கு தான் வருவனுங்” இப்படி வட்டார வழக்கில் நான் பேசுவதால் நான் நாகரீகமனிதனாக, படித்தவனாக ஏற்கப்படாமல், இந்த மேட்டிமைச் சமூகத்தால் நிராகரிக்கப் படலாம். அது குறித்த கவலை எனக்கு இல்லை.

என் அன்பின் நண்பர் பழமைபேசிmaniyinpakkam.blogspot.com,pazamaipesi.com அமெரிக்க மண்ணிலே கணிப்பொறி வல்லுனராக பணியாற்றும் இந்த வேளையிலும், அவர் யாரிடம் பேசும் போது ஆங்கில கலவாத தனித் தமிழிலும், வட்டார வழக்கிலும் பேசுவது எனக்கு பெரும் மகிழ்ச்சியைத் தந்தது/. இன்றைய என்னுடைய வட்டார வழக்கு மீதான காதலுக்கு அவரின் நட்பே ஊக்கமாக அமைந்தது.

வேற்று மாநிலத்தில் அல்லது வேற்று நாட்டில், நம் மொழி பேசுபவரோடு ஏற்படும் சந்திப்பு எந்த அளவு மகிழ்ச்சியையும், உற்சாகத்தையும் நமக்கு கொடுக்குமோ, அதே அளவு மகிழ்ச்சியையும், உற்சாகத்தையும் தருகிறது எனது வட்டார வழக்கில் என் மக்களோடு நான் பேசுவது. 

பேராசிரியர் கண்ணன் இன்று மாலை என்னோடு அலைபேசியில் பேசும் போது சொன்னார், உங்களால் நானும் கடந்த ஒரு வாரமாக பாண்டித் தமிழில் பேசுகிறேன். மகிழ்ச்சியாக இருக்கிறது என்றார். எனக்கும் மகிழ்ச்சிதான்.  என் மொழியால் நான் எங்கிருந்துவருபவன், எப்படிப் பட்டவன்,என்பதை இனங்கான ஏதுவாக அமைந்திருக்கும் வட்டார வழக்கு தவிர்த்து ”ஷ,”வையும்” ஜ “வையும் இன்னும் இருக்கும் அத்தனை கிரந்த எழுத்துக்களையும்,வம்படிக்கு இணைத்துக் கொண்டு எனக்கு பழக்கமில்லாத ஒரு புதிய பேச்சு வழக்கு மொழியை பின்பற்றி என் மேட்டிமைத் தண்மையை காட்டிக் கொள்ள எனக்கு விருப்பமில்லை.

வட்டார வழக்கு, மொழியின் திண்மையினை சீர் குலைக்கும். சாதீயத்தை கட்டமைக்க முனைகிறது, மொழியின் பெருமையை கெடுக்கும் என்று பேசும் பேரறிஞர்களுக்கு ஒன்று சொல்ல விரும்புகிறேன். வட்டார வழக்கு என்பது வித்தியாசமான ஒரு வேற்று மொழியில்ல. இன்று நீங்கள் பேசும் நாகரீகத்தமிழின்  பல வேர்ச்சொல்களைத்தான் நாங்கள் இன்றும் பயன்படுத்துகிறோம்.  எங்கள் வட்டார வழக்கின் சிறப்பே இன்னும் நாங்கள் வேர்ச்சொற்க:ளோடும் மரபுப் பெயர்களோடும் புழங்கிக் கொண்டிருப்பதுதான். . ஒலிக் குறிப்புகளில் ஓரிரு மாத்திரைகள் கூடக் குறைய வேண்டுமானால் இருக்கலாம். ஆனால் இவையும் இயல்பானவையே.

சொந்தங்களையும், நட்புகளையும், உறவுகளையும் பிரிந்து,பொருள் ஆதாரம் தேடும் சூழலில், நமக்குள்ளே நாம் தொலைந்தே வெகுகாலமாகிவிட்டது.ஆனாலும்  இன்று இணையப் பெருவழியில் வட்டார வழக்கு பெருமைக்குரிய விசியமாக மாறிப்போனதில் எனக்கு மகிழ்ச்சியே.  பல நேரங்களில் வட்டார வழக்கில் நாம் பலரும் பேசத் தொடங்கியுள்ளதை காணமுடிகிறது.

வட்டார வழக்கில் எழுதப் படும் கதை மற்றும் கட்டுரைகள் பெரும் வரவேற்பை பெருகின்றன.  நட்சத்திர எழுத்தாளர்கள் கூட அவரவர் வட்டார வழக்கில் எழுதிக் குவிக்கின்றனர். திரைப்பட வசனங்களில் கூட வட்டார வழக்கே முன்னிறுத்தப் படுகிறது.

வாழ்க தமிழ்ச் சமூகம்


வட்டார வழக்கில் எழுதப்பட்ட ஒரு கவிதை......



என்னெய அடீங்கொ
கொல்லுங்கொ
காவலுக்கு ஆள் போடுங்கொ
நீங்கொ பாத்து வெச்சிருக்கிறெ
மாப்புள்ளைக்கெ என்னெக் கெட்டி வெய்யுங்கொ
கட்டிக்கெறென்
அவனுக்கு புள்ளெ பெத்துத் தரச்சொல்லுங்கொ
பெத்துக்கெறென்
ஆனா
என்னிக்காவது ஒரு நா
எங்கெய்யாவது ஒரு வாட்டி
அவரு வந்து ‘வா போயர்லாம்’னு
கூப்புட்டுப்போட்டார்னு வெய்ங்கொ
என்றெ அப்பன் மேல சத்தியமாச் சொல்றென்
போட்டெதும் போட்டபெடி கெடக்கெ
அப்பிடியெ அவருகூடப்போயிர்ருவென்…. ஆமா….
                                               -கவிஞர் மகுடேசுவரன்.
                                           http://kavimagudeswaran.blogspot.com/


திரு. பெருமாள் முருகன் அவர்களின் சிறுகதை:

மாப்புக் கொடுக்கோணுஞ்சாமி..........


http://www.perumalmurugan.com/2011/11/blog-post.html

இலக்கிய இன்பம்

பல்வேறு சிறப்புக்களை தன்னுள்ளே பொருந்தியிருக்கும் மொழி நம் தமிழ் மொழி என்பதில் சந்தேகமில்லை. ஒரு பொருளை அல்லது பயன்பாட்டைக் குறிக்க பொதுவான சொற்கள் இருப்பினும், நம் மொழியில் சிறப்புப் பெயர்களால் குறிப்பிடப்படுவது சிறப்பே.

ஒருவன் - ஒருத்தி என்ற சொற்களை ஆண்பால் - பெண்பாலைக் குறிக்கப் பயன்படுத்துகிறோம்.  ஒருவர் என்ற சொல் இருபலரையும் குறிக்குமுகமாக பயன்படுத்தப் படுவது நம் சொல் வளத்தினை உலக்குக்குப் பறைசாற்றுகிறது. 

“ ஒருவனுக்கும் ஒருத்திக்கும் உருவென்றால் அவ்
  வுருவை இக் தொருத்தன் என்கோ? ஒருத்தி என்கோ?
  இருவருக்கும் உரித்தாக ஒருவர் என்றோர்
  இயற்சொல் இல தெனின் யான் மற் றென் சொல் வேனே.”

                                     -குமரகுருபரர்

இலை என்ற ஒற்றைச் சொல் பொது வழக்காக இருப்பினும் இதற்கு நான்கு வேறு சொற்களும் உண்டு.  மா,  வாழை முதலின ”இலை” என்றும்..நெல், கேழ்வரகு முதலியன ”தாள்” என்றும், கரும்பு, சோளம் போன்றவை “தோகை” என்றும், தென்னை, பனை போன்றவை ”ஓலை” என்றும் வழங்கபடுகிறது.

பூ என்ற பொதுப்பெயர் அரும்பும் போது “அரும்பு” என்றும், பேரரும்பான போது “போது” என்றும் மலர்ந்த பின் மலர் என்றும், வீழ்ந்தபின் “வீ” என்றும் வாடிய பின் ”செம்மல்” என்றும் அழைக்கப் படும்.

போதொடு நீர் சுமந்தேத்தி, புகுவார் அவர்பின் புகுவே-அப்பர்

அரும்பு என்னும் ஒரு நிலைக்கே, அதன் அளவையொட்டி, அரும்பு, மொட்டு, முகிழ், முகை, மொக்குள் என்ற பல்வேறு சொற்களால் அறிப்படுகின்றன.

”உடலால் இருவர், உயிரால் ஒருவர் ”, ”ஈருடல் ஓருயிர்” என்ற பதங்களெல்லாம் வெறும் பிதற்றல்களாக போயிருக்கும் இந்நாளில், தலைவனும் தலைவியிம் எவ்வாறு ஒன்றாயிருந்தனர் என்பதை “மருவிய பாங்கி மதியிடம் படுத்தல்” என்னும் அகப்பொருள் துறையின்கண் அமைந்த  கச்சியப்ப முனிவரின் இந்தப் பாடல். 

உயிர் எழுத்துக்களில் மட்டுமன்றி மெய்யெழுத்துக்களிலும் அகரம் கரந்து உறைகிறது.  “ அகர முதல எழுத்தெல்லாம்” என்ற வள்ளுவரின் கருத்துக்கு விளக்கம் தருவது போல் அமைந்துள்ளது .

  ” பன்னீருயிரும் பதினெண் உடலும் பயின்று இயக்கும்
    அந்நீர் என அடல் வேலோன் தனக்கும், அமிழ்து உயிர்க்கும்
    முந்நீர் தரள முறுவல் முரி புரு வத்திவட்கும்
    நன்னீர் உயிர் ஒன்று, மெய்யிரண்டாகி நயந்ததுவே”  

இனிமை என்பது தமிழுக்கு “ழ” கரத்தால் மட்டும் ஏற்பட்டதன்று, எழுத்தினிமை போன்றே, சொல்லினிமை, செய்யுளினிமை, அணியினிமை, இலக்கியவினிமை, இசையினிமை, கூத்தினிமை எனப் பிற இனிமைகளுமுண்டு.

                                    -தேவநேயப் பாவாணர், - தமிழ் வரலாறு.

மறைந்த போன தமிழ் நூல்கள்.......

இருந்தமிழே உன்னால் இருந்தேன் இமையோர்
விருந்தமிழ்தமென்றாலும் வேண்டேன்
உதிப்பித்த பன்னூல் உளிர அடியேன்
பதிப்பிக்கவே கடைக்கண் பார் 

                தமிழ் தாத்தா உ.வே. சா அவர்களின் நினைவு நாள் நாளை ஆகஸ்ட் 28.. அவர்தம் பெரும்பணியை நினைவுகூறாமல் இருக்கமுடியாது.  அனலாலும் புனலாலும் அயலார் படையெடுப்பாலும், சமயச் சண்டைகளாலும், கரையான் அரிப்பாலும் அழிந்து போக இருந்த பல புத்தகங்களை தொகுத்து வழங்கியவர்.  தன் வாழ்நாளின் பெரும்பணியாக இதைச் செய்து முடித்தார்.

மயிலை சீனி வெங்கடசாமி அவர்கள் தொகுத்து எழுதிய மறைந்து போன தமிழ் நூல்கள் என்ற புத்தகத்தை படிக்கும் வாய்ப்பு கிடைத்தது.  ஒரு புத்தகம் இருந்தது என்பதை நமக்குச் சொல்வது உரையாசிரியர்கள் கொடுக்கும் மேற்கோள்களே.  அதன் படி கீழ் குறிப்பிட்ட நூல்கள் மறைந்து போய்விட்டன என்று ஆசிரியர் குறிப்பிடுகின்றார்.

தனக்கு குழந்தை இல்லாத மயிலை. சீனி வெங்கடசாமி அவர்கள் இரண்டு குழுந்தைகளை தத்தெடுத்து தன் வீட்டில் வளர்த்து வந்தார். எதிர்பாராதவிதமாக அக்குழந்தைகளும் இறந்து போயினர்.  நம் வீட்டு குழந்தைகள் போல் தமிழ் அன்னையின் எத்தனையோ குழந்தைகள் மறைந்து போயிருப்பார்கள்.  தொலைந்து போன தமிழன்னையின் குழுந்தைகளை மீட்டெடுப்பது ஒருபுறமாயினும், தொலைந்து போன குழுந்தைகளின் கணக்கையாவது எடுப்போமே என்ற முயற்சியில் இதை எழுதி வெளியிட்டுருக்கின்றார்.

பதிப்பாசிரியர் ச. மெய்யப்பன் அவர்களின் “மெய்யப்பன் தமிழாய்வகத்தின் “ மூலம் வெளியிடப்பட்ட இந்த நூல் அறிஞர் மயிலை. சீனி. வெங்கடசாமி அவர்களால் தொகுக்கப் பட்டிருக்கிறது.  தமிழார்வளர்கள் அனைவரும் வாங்கிப் படிக்க வேண்டியது. 

எந்தெந்த உரையாசிர்களினால் எந்தெந்த இடங்களில் இந்த மறைந்து போன புத்தகங்கள் பற்றிய குறிப்புகள் இருக்கின்றன என்பதை மிக அழகாக பாடல்களோடு கொடுத்துள்ளார்.

மனிதன் காணாமல் போனால் காவல் நிலையத்தில் கண்டுபிடித்துக் கொடுப்பது போல காணாமல் போன இலக்கியங்களை கண்டுபிடித்துக் கொடுக்க ஒவ்வொரு நாட்டிலும் ஏதாவது ஒரு அமைப்பு இருக்கிறதா? என்ற கேள்வில் தொடங்குகிறது ஊ. ஜெயராமன் (கொற்றன்கனை) அவர்களின் தொடக்கவுரை. 

மறைந்த போன நூல்களின் பட்டியல்.
    இலக்கிய நூல்கள்                                                       நூல் ஆசிரியர்
   1. அகத்திணை                                                              ஆசிரியர் பெயர் இல்லை
  2. அசதி கோவை                                                          இடைக்கால ஒவையார்
  3 அண்ணாமலைக் கோவை                                              கமலை ஞானப் பிரகாசர்
  4 அரையர் கோவை                                                        நூலாசிரியர் பெயர் இல்லை
  5 அறம் வளர்த்த முதலியார் கலம்பகம்                     பிற்காலப் பாண்டியர் ஒருவர்
  6 இராமீசுரக் கோவை                                                       கயாதரர்
  7 இன்னிசை மாலை                                                        நூலாசிரியர் பெயர் இல்லை
  8 கச்சிக் கலம்பகம்                                                      தத்துவப் பிரகாச ஞானப்பிரகாசர்
  9 கண்டனலங்காரம்                                                        நூலாசிரியர் பெயர் இல்லை
 10 காரி கோவை                                                           காரி நாயனார் 
 11  காரைக் குறவஞ்சி                                                       காரைத்தீவு சுப்பையர்
 12 கிளவித் தெளிவு                                                         நூலாசிரியர் பெயர் இல்லை
 13 கிளவி மாலை                                                           நூலாசிரியர் பெயர் இல்லை
 14 கிளவி விளக்கம்                                                         நூலாசிரியர் பெயர் இல்லை
 15 குண நாற்பது                                                           நூலாசிரியர் பெயர் இல்லை
 16 குமாரசேனாசிரியர் கோவை                                               குமாரசேனாசிரியர்
 17 கோயிலந்தாதி                                                          நூலாசிரியர் பெயர் இல்லை
 18 சிற்றெட்டகம்                                                           நூலாசிரியர் பெயர் இல்லை
 19 தமிழ் முத்தரையர் கோவை                                        நூலாசிரியர் பெயர் இல்லை
20 திருவதிகைக் கலம்பகம்                                                   உத்தண்ட வேலாயுத பாரதி
21 திருமறைக்காட்டந்தாதி                                                   சேரமான் பெருமான்
22 தில்லையந்தாதி                                                         நூலாசிரியர் பெயர் இல்லை
23 நந்திக் கோவை                                                         நூலாசிரியர் பெயர் இல்லை
24 நறையூரந்தாதி                                                          நூலாசிரியர் பெயர் இல்லை
25 நாலாயிரக் கோவை                                                      ஒட்டக் கூத்தன்
26 பல்வசந்த மாலை                                                       நூலாசிரியர் பெயர் இல்லை
27 பொருளியல்                                                           நூலாசிரியர் பெயர் இல்லை
28 மழவை எழுபது                                                        நூலாசிரியர் பெயர் இல்லை
29 வங்கர் கோவை                                                        நூலாசிரியர் பெயர் இல்லை 
30 வச்சத் தொள்ளாயிரம்                                                   நூலாசிரியர் பெயர் இல்லை
31 வல்லையந்தாதி                                                       குறட்டி வரதையன்

இந்த நூல்களிலிருந்து நமக்குக் கிடைத்த ஓரிரு பாடல்களையும் ஆசிரியர் வெளியிட்டுள்ளார். பல நூல்களில் ஆசிரியர் வரலாறோ யார் மீது பாடப்பட்டதென்றோ தெரியாமலும் இருக்கின்றது.

     புறப்பொருள்
1.  ஆசிரிய மாலை                                                          நூலாசிரியர் பெயர் இல்லை
2  தகடூர் யாத்திரை                                                       அரிசில்கிழார், பொன்முடியார் முதலியொர்    
3  பெரும்பொருள் வுளக்கம்                                        நூலாசிரியர் பெயர் இல்லை
4  கூடல சங்கமத்துப் பரணி                                       நூலாசிரியர் பெயர் இல்லை
5  கொப்பத்துப் பரணி                                                    நூலாசிரியர் பெயர் இல்லை
6  தென்றமிழ் தெய்வப் பரணி                                      ஒட்டக்கூத்தர்
7  வேறு பரணி நூல்கள்                                               நூலாசிரியர் பெயர் இல்லை
8  வீரமாலை                                                                   புலவர் பாண்டி கவிராசர்
9  பேர்வஞ்சி                                                                     மறச் சக்கரவர்த்திப் பிள்ளை


       காவியங்கள்

1  பழைய இராமாயணம்                                           நூலாசிரியர் பெயர் இல்லை
2 ஜைன இராமாயணம்                                             நூலாசிரியர் பெயர் இல்லை
3 சங்க காலத்துப் பாரதம்                                        நூலாசிரியர் பெயர் இல்லை
4 பெருந்தேவனார் பாரதம்                                     பாரதம் பாடிய பெருந்தேவனார்
5 வத்சராசன் பாரதம்                                               வத்சராசன்
6 குண்டலகேசி                                                          நாதகுத்தனார்
7 வளையாபதி                                                           நூலாசிரியர் பெயர் இல்லை
8 புராண சாகரம்                                                        நூலாசிரியர் பெயர் இல்லை
9 விம்பசாரக் கதை                                                   நூலாசிரியர் பெயர் இல்லை


   இலக்கிய நூல்கள்

1.  அந்தாதி மாலை                                                   சேந்தன்
2  அமிர்த பதி                                                               நூலாசிரியர் பெயர் இல்லை
3  அந்தாதிக் கலம்பகம்                                           அகோர முனிவர்
4  அளவை நூல்                                                        நூலாசிரியர் பெயர் இல்லை
5  அவினந்த மாலை, அரசசட்டம், வருத்தமானம்    நூலாசிரியர் பெயர் இல்லை
6  அறிவுடை நம்பியார் சிந்தம்                             நூலாசிரியர் பெயர் இல்லை
7  ஆயிரப்பாடல்                                                       கமலை ஞானப் பிரகாசர்
8  ஆரியப் படலம்                                                     நூலாசிரியர் பெயர் இல்லை
9  இசையாயிரம்                                                        நூலாசிரியர் பெயர் இல்லை
10 இராசராச வுஜயம்                                              நாராயண பட்டாதித்யன்
11 இராமயண வெண்பா                                        நூலாசிரியர் பெயர் இல்லை
12 இரும்பல் காஞ்சி                                                நூலாசிரியர் பெயர் இல்லை
13 இளந்திரையம்                                                    நூலாசிரியர்   தகவல் இல்லை
14 இறைவானறையூர்ப் புராணம்                    திருமலை நாயினார் சந்திரசேகரர்
15 ஓவிய நூல்                                                         நூலாசிரியர் பற்றிய தகவல் இல்லை
16 கன்னிவன புராணம்                                       பரசமயக் கோளரி மாமுனி
17 அஷ்டதச புராணம்                                          பரசமயக் கோளரி மாமுனி
18 கலைக் கோட்டுத் தண்டு                             கலைக்கோட்டு தண்டம்
19 காங்கேயன் பிள்ளைக் கவி                          பெரியான் ஆதிச்ச தேவன்
20 காசியத்திரை விளக்கம்                              யாழ்ப்பாணம் மயில்வாகனப் புலவர்
21 கிளி விருத்தம், எலி விருத்தம்                  நூலாசிரியர் பற்றிய தகவல் இல்லை
22 கோட்டீச்சுர உலா                                         கொட்டையூர் சிவக்கொழுந்து தேசிகர்
23 குலோத்துங்கச் சோழ சரிதை                  நூலாசிரியர் பற்றிய தகவல் இல்லை
24 கோலநற்குழல் பதிகம்                                 நூலாசிரியர் பற்றிய தகவல் இல்லை
25 சதகண்ட சரிதம்                                            நூலாசிரியர் பற்றிய தகவல் இல்லை
26 சாதவாகனம்                                                  நூலாசிரியர் பற்றிய தகவல் இல்லை
27 சாந்தி புராணம்                                             நூலாசிரியர் பற்றிய தகவல் இல்லை
28 சித்தாந்தத் தொகை                                     நூலாசிரியர் பற்றிய தகவல் இல்லை
29 சூத்ரக சரிதம்                                                  சிற்பக் கலைஞர் லலிதாலயர்
30 செஞ்சிக் கலம்பகம்                                    நூலாசிரியர் பற்றிய தகவல் இல்லை
31 சேயூர் முருகன் உலா                               கவிராசர்
32 தசவிடு தூது                                                திரிசிரபுரம் மீனாட்சிசுந்தரம் பிள்ளை
33 தண்டகாரணிய மகிமை                          நூலாசிரியர் பற்றிய தகவல் இல்லை
34 தன்னை யமகவந்தாதி                           யாழ்ப்பாணம் காரைத்தீவு முருகேசையர்
35 திருக்காப்பலூர் குமரன் உலா                       திருக்காமி அவதானியார்
36 திருப்பட்டீசுவரப் புராணம்                       இரேவண சித்தர்
37 திருப்பதிகம்                                              நூலாசிரியர் பற்றிய தகவல் இல்லை
38 திருப்பாலைப் பந்தல்                           காளிங்கராயர் உண்ணாமலை நாயினார்
39 திருமேற்றளி புராணம்                           இரேவணசித்தர்
40 திருவலஞ்சுழி புராணம்                           இரேவணசித்தர்
41 திரையக் காணம்                                      நூலாசிரியர் பற்றிய தகவல் இல்லை
42 துரியோதன கலம்பகம்                          நூலாசிரியர் பற்றிய தகவல் இல்லை
43 தேசிக மாலை                                          நூலாசிரியர் பற்றிய தகவல் இல்லை
44 நல்லைநாயக நான்மணிமாலை     காரைத்தீவு சுப்பையர்
45 நாடத சரிதை                                               நூலாசிரியர் பற்றிய தகவல் இல்லை
46 பரமத திமிரபானு                                   மறைஞான சம்பந்தர்
47 பரிப்பெருமாள் காமநூல்                       நூலாசிரியர் பற்றிய தகவல் இல்லை
48 பரிபாடை                                                     நூ லாசிரியர் பற்றிய தகவல் இல்லை   
49 பிங்கல சரிதை                                         நூலாசிரியர் பற்றிய தகவல் இல்லை
50 வாமன சரிதை                                         நூலாசிரியர் பற்றிய தகவல் இல்லை
51 பிங்கலகேசி                                             நூலாசிரியர் பற்றிய தகவல் இல்லை   
52 அஞ்சனகேசி                                            நூலாசிரியர் பற்றிய தகவல் இல்லை
53 காலகேசி                                                   நூலாசிரியர் பற்றிய தகவல் இல்லை
54 தத்துவதரிசனம்                                     நூலாசிரியர் பற்றிய தகவல் இல்லை
55 புட்கரனார் மந்திரநூல்                       நூலாசிரியர் பற்றிய தகவல் இல்லை
56 மஞ்சரிப்பா                                             ஞானப் பிரகாசர்
57 மல்லிநாதர் புராணம்                         நூலாசிரியர் பற்றிய தகவல் இல்லை
58 மாடலம்                                                  மாடலனார்
59 மார்க்கண்டேயனார் காஞ்சி          நூலாசிரியர் பற்றிய தகவல் இல்லை
60 மாறவர்மன் பிள்ளைத்தமிழ்          நூலாசிரியர் பற்றிய தகவல் இல்லை
61 முப்பேட்டுச் செய்யுள்                       நூலாசிரியர் பற்றிய தகவல் இல்லை
62 மூவடி முப்பது                                    நூலாசிரியர் பற்றிய தகவல் இல்லை
63 வாசுதேவனார் சிந்தம்                     நூலாசிரியர் பற்றிய தகவல் இல்லை
64 வீரணுக்க  விசயம்                           பூங்கோயில் நம்பி


இசைத் தமிழ் நூல்கள்

1  இசைத்தமிழ்ச் செய்யுட்டுறைக் கோவை  நூலாசிரியர் பற்றிய தகவல் இல்லை
2  இசை நுணுக்கம்                                   சிகண்டி முனிவர்
3  இந்திரகாளியம்                                    பாரசவ முனிவர் மாமளேந்திரர்
4  குலோத்துங்கன் இசை நூல்           குலோத்துங்கச் சோழன்
5  சிற்றிசை                                                நூலாசிரியர் பற்றிய தகவல் இல்லை
6  பேரிசை                                                   நூலாசிரியர் பற்றிய தகவல் இல்லை
7  பஞ்ச பாரதீயம்                                    நாரதர்
8  பஞ்ச மரபு                                            அறிவனார்
9  பதினாறு படலம்                              நூலாசிரியர் பற்றிய தகவல் இல்லை
10 பெருநாரை/பெருங்குருகு           நூலாசிரியர் பற்றிய தகவல் இல்லை
11 வாய்ப்பியம்                                      வாய்ப்பியனார்


நாடகத்தமிழ் நூல்கள்

1  அகத்தியம்                                                   அகத்தியமுனிவர்
2  இரச ராசேசுவர நாடகம்                        திருவாலன் திருமுதுகுன்றன்
3  காரைக் குறவஞ்சி                                 காரைத்தீவு சுப்பையர்
4  குணநூல்                                                    நூலாசிரியர் பற்றிய தகவல் இல்லை
5  குருஷேத்திர நாடகம்                            காரைத்தீவு முருகேசையர்
6  கூத்தநூல்                                              நூலாசிரியர் பற்றிய தகவல் இல்லை
7  சந்தம்                                                     நூலாசிரியர் பற்றிய தகவல் இல்லை
8  சயந்தம்                                                 நூலாசிரியர் பற்றிய தகவல் இல்லை
9  செயன்முறை                                    நூலாசிரியர் பற்றிய தகவல் இல்லை
10 செயிற்றியம்                                    செயிற்றினார்
11 சோமகேசரி நாடகம்                      மாப்பாண முதலியார்
12 ஞானாலங்கார நாடகம்             யாழ்பணத்து மாதகல் மயில்வாகனப் புலவர்
13 திருநாடகம்                                     நூலாசிரியர் பற்றிய தகவல் இல்லை
14 நூல்                                                      நூலாசிரியர் பற்றிய தகவல் இல்லை
15 பாரதசேனாபதீயம்                        ஆதிவாயிலார்
16 பரிமளகா நாடகம்                        மாப்பாண முதலியார்
17 மதிவாணர் நாடக்த்தமிழ் நூல்     பாண்டியன் மதிவாணன்
18 முறுவல்                                         நூலாசிரியர் பற்றிய தகவல் இல்லை
19 பூம்புலியூர் நாடகம்                        பரசமயக் கோளரி மாமுனி
20 கடகண்டு                                       நூலாசிரியர் பற்றிய தகவல் இல்லை
21 வஞ்சிப்பாட்டு                               நூலாசிரியர் பற்றிய தகவல் இல்லை
22 மோதிரப் பாட்டு                          நூலாசிரியர் பற்றிய தகவல் இல்லை
23 விளக்கத்தார் கூத்து                        விளக்கத்தார்


இலக்கண நூல்

1  அகத்தியம்                                             அகத்தியர்
2  அகத்தியர் பாட்டியல்                        அகத்தியம்
3  அணியியல்                                          நூலாசிரியர் பற்றிய தகவல் இல்லை
4  அவிநயம்                                            அவிநயனார்
5  அவிநய உரை                                     இராச பவித்திர பல்லவ தரையன்
6  இன்மணியாரம்                              நூலாசிரியர் பற்றிய தகவல் இல்லை
7  நாலடி நாற்பது என்னும் அவிநயப்புறனடை                நூலாசிரியர் பற்றிய தகவல் இல்லை
8  கடிய நன்னியார் கைக்கிளைச் சூத்திரம்                கடிய நன்னியார்
9  கவிமயக்கறை                                   நூலாசிரியர் பற்றிய தகவல் இல்லை
10 காக்கைப் பாடினியம்                        காக்கைப் பாடினியார்
11 குறுவேட்டுவச் செய்யுள்            நூலாசிரியர் பற்றிய தகவல் இல்லை
12 லோகவிலாசினி                            நூலாசிரியர் பற்றிய தகவல் இல்லை
13 பெருவளநல்லூப் பாசாண்டம்      நூலாசிரியர் பற்றிய தகவல் இல்லை
14 கையனார் யாப்பியல்                        கையனார்
15 சங்கயாப்பு                                      சங்கயாப்புடையார்
16 சிறு காக்கைப் பாடினியம்        சிறு காக்கைப் பாடினியார்
17 செய்யுளியல்                                நூலாசிரியர் பற்றிய தகவல் இல்லை
18 செய்யுள் வதுமை                        நூலாசிரியர் பற்றிய தகவல் இல்லை
19 தக்காணீயம்                                 நூலாசிரியர் பற்றிய தகவல் இல்லை
20 தத்தாதிரேயப் பாட்டியல்              நூலாசிரியர் பற்றிய தகவல் இல்லை
21 நக்கீரன் அடிநூல்                        நக்கீரர்
22 நக்கீரர் நாலடிநானூறு             நக்கீரர்
23 நத்தத்தனார் இயற்றிய நத்தத்தம்                    நத்தத்தனார்
24 நல்லாறன் மொழிவரி                        நூலாசிரியர் பற்றிய தகவல் இல்லை
25 பரிப்பெருமாள் இலக்கணநூல்                    பரிப்பெருமாள்
26 பர்மாணனார் யாப்பிலக்கணம்                    பரிமாணனார்
27 பல்காப்பியம்                                      பல்காப்பியனார்
28 பல்காப்பிய புறனடை                        நூலாசிரியர் பற்றிய தகவல் இல்லை
29 பல்காயம்                                        பல்காயனார்
30 பனம்பாரம்                                      பனம்பாரனார்
31 பன்னிருபடலம்                            தொல்காப்பியர் முதலிய பன்னிருவர்
32 பாடலம்                                           பாடலனார்
33 பாட்டியல் மரபு                            நூலாசிரியர் பற்றிய தகவல் இல்லை
34 புணர்ப்பாவை                             நூலாசிரியர் பற்றிய தகவல் இல்லை
35 போக்கியம்                                   நூலாசிரியர் பற்றிய தகவல் இல்லை
36 கிரணியம்                                    நூலாசிரியர் பற்றிய தகவல் இல்லை
37 வது விச்சை                                  நூலாசிரியர் பற்றிய தகவல் இல்லை   
38 பெரிய பம்மம்                            நூலாசிரியர் பற்றிய தகவல் இல்லை
39 பெரிய முப்பழம்                        நூலாசிரியர் பற்றிய தகவல் இல்லை
40 பேராசிரியர் மயேச்சுவரர் இலக்கண நூல்                மயேச்சுவரர்
41 மாபுராணம்                                நூலாசிரியர் பற்றிய தகவல் இல்லை
42 பூதபுராணம்                              நூலாசிரியர் பற்றிய தகவல் இல்லை
43 முள்ளியார் கவித்தொகை                        முள்ளியார்
44 யாப்பியல்                            நூலாசிரியர் பற்றிய தகவல் இல்லை
45 வாருணப் பாட்டியல்                        நூலாசிரியர் பற்றிய தகவல் இல்லை

மயிலை சீனி வெங்கடசாமி அவர்கள் இதைத் தொகுக்கும் போது, மேற்ச்சொன்ன புத்தகங்கள் இருந்திருக்கவேண்டும் என்பதை ஆதாரங்களோடு வெளியிட்டிருக்கிறார். எந்தப் புத்தகத்தைப் பற்றி எந்த பாடலில்,அல்லது எந்த புத்தகத்தில் இருக்கின்றது என்ற எடுத்துக்காட்டுகளோடு எழுதியிருக்கின்றார்.

மேற்சொன்ன புத்தகங்களில் சில முழுமையாக கிடைக்காமல் சில பாடல்கள் மட்டும் கிடைத்திருந்தாலும் அவற்றையும் மறைந்து போன தமிழ்நூல்கள் வரிசையில் சேர்த்துள்ளார்.

அவரின் அரும்பணியை நினைவு கூர்வோம்..........மேற்சொன்ன நூல்கள், இதில் இடம்பெறாத நூல்கள் அல்லது நூல்கள் பற்றிய தகவல்கள்  நம்மிடம் யாரிடமாவது இருக்குமாயின் அதை புதுப்பிக்கவும் முயற்சி செய்யலாம்.  அதற்கான பணியைச் செய்ய ஆர்வமாக இருக்கின்றேன்.

அன்புடன்
ஆரூரன்.

''மிஞ்சி போட்ட ரஞ்சிதமே''

                  
பச்சை மணக்குதடி பாதகத்தி ஒம் மேல
இச்சை பட்ட நேரமெல்லாம் ஏங்கி முகம் வாடுறனே ..
பாக்கு துவக்குதடி பழைய உறவு மங்குதடி ..
ஏலம் கசக்குதடி இன்னொருவன் மையலாலே ...

தங்கத்துக்குத் தங்கம் இருக்க தனித் தங்கம் நானிருக்க..
பித்தாலத் தங்கத்துக்குப் பித்தாசை கொள்ளலாமா?
கடலில் தலைமுழுகி கப்பலில் சிக்கு உலர்த்தி
ரெங்கத்துப் பூ ஒடிச்சு நேரவாடி பேசிப் போவோம் ..
கரை போட்ட கழுத்தழகி கடுக்கை போட்ட முகத்தழகி..
மிஞ்சி போட்ட ரஞ்சிதமே மின்னவாடி பேசிப் போவோம் ..

ஒத்தபனை சித்தநந்த ஒழுகு பனை ராமேஸ்வரம்
கும்பபனை அறியவேறு குயிலு இருந்தும் கூவாதோ..
சோட நந்த கண்மாய்க்குள்ள சோடி புறா மேயயிலே ..
சோடி பிரிஞ்சன்னைக்கு சோரவிட்டேன் கண்ணீரை ..
கம்மாய்க்குள் கழுகு மரம் கலந்து பேசி ஆறுமாதம் ..
சந்திக்கிற நேரமெல்லாம் சனியன் வந்து நேரிடுதே...

கொலவாலு நெல்லுகுத்தி கொலயாம சோறு பொங்கி
எலவாங்க போன மச்சான் எவளோட தாமுசமோ ..
ஆத்துக்குள்ள அஞ்சரளி அத்தை மவன் வச்சரளி ..
காக்கிதுல்ல பழுக்குதில்ல கவ்வோதிபய வச்சரளி ..
எண்ணெ தேச்சு தலை முழுகி நடுத்தெருவே போரவரே ..
வண்ணமிட்ட தலைபோல என் கண்ணைப் பறிக்குதய்யா ...

(மதுரை மாவட்டம் பேரையூரைச் சேர்ந்த மீனாள் (வயது 45) என்பவர் சொல்ல அதைப் பதிவு செய்தது திருச்சி பிஷப் ஹீபர்கல்லூரியின் தமிழ்த் துறை மாணவ, மாணவிகள்)

நன்றி
http://thatstamil.oneindia.in/art-culture/folk/2005/folk1.html

மொழி மாசு.........

மாசு........எங்கும்............எதிலும் மாசு.

உண்ணும் உணவில், குடிக்கும் நீரில், சுவாசிக்கும் காற்றில், இப்படி எங்குகாணினும்      மாசு...........

பேசும் மொழியையும் அது விட்டுவைக்கவில்லை...

இருபதாம் நூற்றாண்டின் துவக்கத்தில் மொழி மாசுபடுவதை தவிர்க்க, எத்தனையோ தமிழறிஞர்கள் பெருந்தொண்டாற்றினார்கள்.   பட்டியலிட்டால் மாளாது.....ஆனாலும், மாசு நீட்சியை தவிர்க்கமுடியவில்லை.

தனித்தமிழ் இயக்கங்கண்ட, மறைமலை அடிகள் பெயரை, புகைவண்டி நிலையத்திற்கு பெயராக சூட்டுவதோடு நின்றுபோனது......... நமது மொழியார்வம்.

உயர்சாதி நாங்கள் என்ற வரட்டு ஆணவத்தின் மீதான காதலில், நம்மில் பலரும் வடமொழிச் சொற்களை பேச்சு வழக்கில் பயன்படுத்துகிறோம்.   அதை மாற்ற முயலும் முயற்சியாக சிலவற்றை இங்கே காண்போம்.

நடைமுறை வாழ்க்கையில் மாறிப்போன சில தமிழ் வார்த்தைகள்........



தமிழ் மொழி        வடமொழி                          தமிழ் மொழி                 வடமொழி   

  சோறு        -             சாதம்                                       குழம்பு               -          சாம்பார்
 
  சுவைநீர்       -           ரசம்                                         வரிசை             -           பந்தி

  நலமா?        -          சவுக்கியமா?                          மகிழ்ச்சி           -          சந்தோஷம்

  அறிவாற்றல்    -    புத்திசாலித்தனம்               விளக்கு           -            தீபம்

  பூப்பலி, பூ செய் -    பூஜை                                    குடமுழுக்கு       -        கும்பாபிஷேகம்

  பிறவிப்பயன்    -    ஜென்ம சாபல்யம்             வீடுபேறு            -        மோட்ஷம்

 கணவன் மனைவி -   பதியும், பாரியாளும்,     துறவறம்          -      சன்னியாசம்

இப்படிய எத்தனையோ.........?


அன்பிற்கு பிரியமும்,                            குறும்புக்கு சேஷ்டையும்
 
அமைதிக்கு சாந்தியும்                            நாணத்திற்கு சங்கோஜமும்

நட்புக்கு சினேகமும்                                இழப்பிற்கு நஷ்டமும்

பகைக்கு விரோதமும்                            விருப்பத்திற்கு இஷ்டமும்

அறிவுக்கு புத்தியும்.                                   நினைவிற்கு ஞாபகமும்

நல்வாய்ப்பிற்கு அதிர்ஷ்டமும்          கனவுக்குப் பதில் சொப்பணமும்

பரவலாக   பயன்படுத்தப் படுகின்றன.



காற்று        -   வாயு                                 இரவு     -    ராத்திரி

நிலா            -    சந்திரன்                         ஏனம்     -    பாத்திரம்

அறம்           -    தர்மம்                            வினை    -    கர்மா

வானம்          -    ஆகாயம்                    செய்யுள்  -     கவிதா


என்று தமிழாக்கம்  செய்யும் அதிமேதாவிகளையும் நாம் காண்கின்றோம்.



தமிழர் தம் திருநாளாம் இன்று, பைந்தமிழ் வார்த்தைகளை பயன்படுத்துவோம். மொழி மாசுக்கு கட்டுப்பாட்டுகள் விதிப்போம்.  

" தலை போயினும் தயங்காது தமிழ்-போற்றிடத்துணிவாய்
  தமிழே இனி எனதாருயிர் - தலை தூக்கிடு தோழா...."


வாழ்க நிரந்தரம், வாழ்க தமிழ் மொழி  வாழிய வாழியவே
வானமளந்தானைத்தும் அளந்திடும் வண்மொழி வாழியவே
ஏழ்கடல் வைப்பினும், தன்மணம் வீசி, இசைகொண்டு வாழியவே
எங்கள் தமிழ் மொழி, எங்கள் தமிழ் மொழி, என்றென்றும் வாழியவே.

நண்பர் செந்திலின் இடுகைக்கள் உங்கள் பார்வைக்காக:

http://senthilinpakkangal.blogspot.com/2009/06/1.html

http://senthilinpakkangal.blogspot.com/2009/06/2.html

http://senthilinpakkangal.blogspot.com/2009/07/9.html




நன்றி:-
மறைமலையடிகள்
நிறைதமிழ் விழா குழு

தமிழ்க் கடல்

அலைஓசை

பரவும் தமிழ் மாட்சி

பெட்டாலிங் ஜெயா மணி மன்றம்.
மலேசியா.